Mama, Unsa Ka?

(Pasaylo, Tita Lacambra Ayala)

Mama, tomboy ka? ngutana akong anak.
Nasakpan ko niyang nagkalo,
Nanglukot sa bukton sa akong long sleeves
Naninghawak ug gahikaphikap sa akong bigote
Atubang sa dakong samin sa among kuwarto.
Wala siya kahibalo nga ingon ana na gyud ko
Sa mga adlaw nga abuton ko’g kakapoy
Sa akong pagkananay ug pagkababaye
Kanang nagkay-ag ang balay
Ug akong dughan nangguot sa kalaay
Akong kalag mangitag lugway
Maglakaw-lakaw sa laing lungsod,
Aron manikop og laing kalipay.

Apan kasubo aning pagkadulaa
Kay kinahanglan buhaton kun nag-inusara
Atubangan sa samin atbang sa laing babaye
Nga ang nawong mao ra gihapon,
Walay bigote
Nasulod sa rektanggulong kwadro
Nagsundog-sundog, nanura,
Ug naglantaw sa imong namalandong nga mga mata
Gipalibotan sa nagbitay nga mga labhanan
Gibisbisan sa nagkalamukat nga mga plastik nga dulaan
Ug sa dapit sa pultahan dunay batang laki
Nagtindog, nagnganga. Wa nakaila.
Asa siya gikan?
Ug kinsa sad siya?